சங்கீதம் 64
மறைவுகளில் உத்தமன்மேல் எய்யும்பொருட்டுக் கசப்பான வார்த்தைகளாகிய தங்கள் அம்புகளை நாணேற்றுகிறார்கள்; சற்றும் பயமின்றிச் சடிதியில் அவன்மேல் எய்கிறார்கள். - சங்கீதம் 64:4
ஒரு மடத்தில் உள்ள துறவி தலைவரிடம் போய் நான் கோள் சொல்லியிருக்கிறேன் என்று அறிக்கையிட்டார். தலைவரும் துறவியை அந்த நகரத்திலுள்ள ஒவ்வொரு வீட்டு வாசலிலும் ஒரு இறகை வைத்து வரும்படி சொன்னார். பின் அவற்றை எல்லாம் திரும்பவும் சேகரித்து வருமாறு சொன்னார். அது நடக்காத விஷயம் என்றார் துறவி. அவைகள் ஊர் முழுவதும் காற்றில் பரவியிருக்குமே என்றார் அவர். உன் வார்த்தைகளும் அப்படித்தான் பரவியிருக்கின்றன என்பதைப் புரிந்து கொள் என்றார் தலைவர்.
பிறரைப் பற்றிப் பேசுவது என்பது எல்லோருக்குமே ருசிகரமாக இருக்கின்றது. அது ருசியுள்ள பதார்த்தம் போல நமக்குள் இறங்கும் என்று நீதிமொழிகள் புத்தகம் சொல்கிறது. மற்றவர்களைப் பற்றி நாம் பேசுவதை பிறர் ரசித்துக் கேட்டாலும் நம்மைப் பற்றிய அவர்களது எண்ணங்கள் எப்படி இருக்கும் என்பது நமக்குத் தெரியாது. இதே நபர் நம்மைப் பற்றியும் மற்றவர்களிடம் இப்படித் தானே பேசுவான் என்னும் எண்ணம் அவர்களிடம் ஏற்படுவதைத் தவிர்க்க முடியாது. பிறரைப்பற்றி சொல்லும் வார்த்தைகளால் சொல்பவரின் மதிப்பே கெட்டுப் போகும்.
”அவர்கள் தள்ளப்பட்டு, கீழேவிழும்படி அவர்கள் நாவுகளே அவர்களைக் கெடுக்கும்; அவர்களைக் காண்கிற யாவரும் ஓடிப்போவார்கள்.” என்று தீய நாவுள்ளவர்களின் முடிவைப் பற்றி தாவீது எழுதி வைத்திருக்கிறார்.
எனவே உங்கள் நடுவில் இல்லாத ஒரு நபரைப் பற்றிய பேச்சுக்களை தவிர்த்துவிடுங்கள். அதிலும் மற்றவர்களின் குறைகளைப் பற்றி அவர்கள் இல்லாத நேரம் பேசவே செய்யாதீர்கள். இது உங்களைப் பற்றிய மதிப்பை உயர்த்தும். நீங்களும் உங்கள் நாவால் பாவம் செய்யாதபடி உங்களைப் பாதுகாக்கும்.
சிந்தனை : இன்று நீங்கள் கெடுத்த பெயரை நாளை நீங்களே சரி செய்ய நினைத்தாலும் முடியாது.
ஜெபம் : தேவனே, என் விண்ணப்பத்தில் என் சத்தத்தைக் கேட்டருளும்; சத்துருவால் வரும் பயத்தை நீக்கி, என் பிராணனைக் காத்தருளும். துன்மார்க்கர் செய்யும் இரகசிய ஆலோசனைக்கும் அக்கிரமக்காரருடைய கலகத்துக்கும் என்னை விலக்கி மறைத்தருளும். ஆமென்.
For Audio Tracks visit : DD-Tamil
No comments:
Post a Comment