நீதிமொழிகள் 16
நீதியின் வழியில் உண்டாகும் நரைமயிரானது மகிமையான கிரீடம். - நீதிமொழிகள் 16:31
வாலிபத்தின் அழகும் வலிமையும் உடல் சார்ந்ததாகக் கடவுள் திட்டமிட்டிருக்கிறார். ஆனால் வயதானவர்களின் அழகும் பலமும் ஆன்மீகம் சார்ந்ததாக இருக்கின்றது. நித்திய காலத்துக்கும் இருக்கக்கூடிய அழகையும் வலிமையையும் பற்றி நாம் அதிகம் கவனம் செலுத்துவதற்கு ஏற்றவிதமாக, தற்காலிகமான அழகையும் வலிமையையும் நாம் படிப்படியாக இழக்கிறோம். - ராபர்ட்சன் மெக்குயில்கின்.
வயதானவர்களுக்கு நாம் மரியாதை கொடுக்கிறோம். அரசாங்கமும் அவர்களுக்குப் பல சலுகைகளைத் தருகின்றது. ஆனால் வயதானவர்கள் தவறான வழிகளில் பணத்தைச் சேர்க்கும் போது, இளைஞர்களைத் தீமையான வழிகளில் நடத்தும் போது அவர்களது மதிப்பு குறைந்து போய்விடுகின்றது. ஆகவே வயது அதிகமானால் மட்டும் போதாது அதாவது நரைமுடி மட்டும் மதிப்பைத் தருவதில்லை அது நீதியின் வழிகளில் வரும் போது பலரும் அவர்களது ஆலோசனைக்காக வழிகாட்டுதலுக்காகக் காத்திருப்பார்கள். பலர் மதிப்பார்கள்.
பெரியவர்களை மதிப்பது மட்டுமல்லாமல் நாம் பெரியவர்களாகும் போது நம்மையும் பிற்காலத்து இளைஞர்கள் மதிக்கும் அளவுக்கு நாம் நமது வாழ்க்கையை நீதியின் வழிகளில் நடத்த வேண்டும். தற்காலிகமான அழகு மற்றும் உடல் வலிமைகளால் மனம் போன வாழ்க்கை வாழ்ந்தால் நமது வயோதிபகாலம் நமக்கு மகிமையாக இருக்காது. நீதியின் வழியானது நமது மனசாட்சியுடன் பரிசுத்த ஆவியானவரும் வேதவசனங்களும் இணையும் போது நமக்குக் காட்டப்படுகின்றது. பெரியவர்கள் நமக்கு நீதியின் வழிகளைக் கற்றுத் தருவது போல நாமும் வருங்காலத்துக்கு வழிகாட்டிகளாக இருக்க வேண்டும் என்றால் நீதியின் வழிகளில் நடக்க வேண்டும்.
சிந்தனை : இளநரையும், கரும் மை பூசிய முதியவர்களின் நரையும் காலத்தை மீறியதாகும். நரைமுடியே கிரீடம் என்று சொல்லுமளவுக்கு இளமையில் வாழ்ந்து காட்டுவோம்.
ஜெபம் : நித்திய கர்த்தரே, எங்கள் இளமையும் முதுமையும் உம் நீதியின் வழியிலேயே பயணம் செய்ய வழிகாட்டி பலப்படுத்தும். ஆமென்.
For Audio Tracks visit : DD-Tamil
